नेपालगञ्ज ।
नेपालगञ्ज मेडिकल कलेज, कोहलपुरमा कार्यरत डा. कविता सिन्हा र डा. होम नाथ अधिकारी नेतृत्वको चिकित्सक टोलीले १०० औँ पाठेघरसम्बन्धी ल्याप्रोस्कोपी (Keyhole surgery) सफलतापूर्वक सम्पन्न गरेको छ। यस उपलब्धिले विशेषगरी महिलाको स्वास्थ्य सेवामा महत्वपूर्ण योगदान पुर्याएको भन्दै सरोकारवालाले प्रशंसा गरेका छन्।
अत्याधुनिक प्रविधिको प्रयोग गर्दै गरिने ल्याप्रोस्कोपी शल्यक्रिया अहिलेको समयमा सुरक्षित, प्रभावकारी र बिरामीमैत्री विधिका रूपमा स्थापित हुँदै गएको छ। पेटमा साना–साना प्वाल बनाएर क्यामेरा (ल्याप्रोस्कोप) र विशेष उपकरणको सहायताले गरिने यस विधिबाट पाठेघर तथा स्त्रीरोगसम्बन्धी विभिन्न जटिल समस्याहरूको उपचार सम्भव हुन्छ।
यस विधिबाट पाठेघरको गाँठो (फाइब्रॉइड), एन्डोमेट्रियोसिस, अण्डाशयको सिस्ट, असामान्य रक्तस्राव तथा पाठेघर निकाल्ने (हिस्टेरेक्टोमी) जस्ता शल्यक्रियाहरू सफलतापूर्वक गरिँदै आएको छ। केही अवस्थामा पाठेघर झर्ने समस्या (प्रोल्याप्स) पनि यसै विधिबाट समाधान गर्न सकिन्छ।
चिकित्सकका अनुसार, बिरामीलाई सामान्य एनेस्थेसियामा राखेर पेटमा २ देखि ४ वटा साना प्वाल बनाई क्यामेरा र उपकरणको सहायताले शल्यक्रिया गरिन्छ। आवश्यक परे पाठेघर वा अन्य प्रभावित भाग निकालिन्छ।
ल्याप्रोस्कोपीको मुख्य फाइदामा ठूलो चिरा नलाग्ने, कम दुखाइ हुने, छिटो निको हुने, अस्पताल बसाइ छोटो हुने र घाउको दाग न्यून देखिने रहेका छन्। यद्यपि, संक्रमण, रक्तस्राव, छेउका अङ्गमा चोट लाग्ने तथा एनेस्थेसियाको साइड इफेक्ट जस्ता केही जोखिमहरू पनि दुर्लभ रूपमा देखिन सक्छन्।
शल्यक्रिया पश्चात् बिरामीले केही दिन आराम गर्नु, भारी सामान नउठाउनु, चिकित्सकको सल्लाहअनुसार औषधि सेवन गर्नु र घाउ सफा राख्नु आवश्यक हुन्छ। ज्वरो, अत्यधिक दुखाइ वा असामान्य रक्तस्राव देखिएमा तुरुन्त अस्पताल सम्पर्क गर्न चिकित्सकले सुझाव दिएका छन्।
सामान्यतया यस्तो शल्यक्रियापछि बिरामी १ देखि ३ दिनभित्र अस्पतालबाट डिस्चार्ज हुने र १–२ हप्तामै दैनिक काममा फर्कन सक्नेछन् भने पूर्ण रूपमा निको हुन ३–४ हप्ता लाग्न सक्छ।
यस सफलताले नेपालगञ्ज मेडिकल कलेज, कोहलपुरलाई पश्चिम नेपालमा आधुनिक स्वास्थ्य सेवाको महत्वपूर्ण केन्द्रको रूपमा स्थापित गर्न थप टेवा पुर्याएको छ। साथै, स्थानीयस्तरमै गुणस्तरीय उपचार उपलब्ध हुन थालेपछि बिरामीलाई बाहिर जानुपर्ने बाध्यता पनि घट्दै गएको छ।
