बाँके क्षेत्र नं. २ मा प्रतिनिधिसभा सदस्यका उम्मेदवार विवेक कुमार श्रेष्ठको पक्षमा जनसमर्थन उत्साहजनक रूपमा बढिरहेको छ। डुडुवा गाउँपालिका वडा नं. ५, दलैपुरमा आयोजित भेटघाट तथा घरदैलो कार्यक्रममा अभूतपूर्व उपस्थिति देखिएको थियो।
युवा होस् वा वृद्ध—सयौंको संख्यामा स्थानीयवासीहरूले राष्ट्रिय स्वतन्त्र पार्टीप्रति समर्थन जनाउँदै “यस पटक नयाँलाई साथ, नयाँ भनेको स्वतन्त्र पार्टीलाई” भन्ने नारासहित मत नबाँडी एकताबद्ध रूपमा अघि बढ्ने प्रतिबद्धता व्यक्त गरेका छन्।
यसै क्रममा उम्मेदवार विवेक श्रेष्ठले आगामी फागुन २१ गते हुने निर्वाचनमा जसरी भए पनि आफू, आफ्ना परिवार, आफन्त तथा सम्पूर्ण शुभेच्छुकहरूलाई घण्टी चिन्हमा मतदान गर्न आग्रह गर्नुभयो। उहाँले मत विभाजनले अन्य पक्षलाई फाइदा पुग्ने भएकाले परिवर्तनका लागि एक ढिक्का भएर मतदान गर्नुपर्ने धारणा राख्नुभयो।
कार्यक्रममा ७५ वर्षीया एक वृद्ध आमाले आशिर्वाद दिँदै विजयको अग्रिम शुभकामना व्यक्त गरिन्। स्थानीय तहमा देखिएको उत्साह, प्रतिबद्धता र एकताले यस क्षेत्रको चुनावी माहोल थप तातेको छ।
