राष्ट्रिय स्वतन्त्र पार्टी (रास्वपा) को प्रवास नेपाली सम्पर्क विभाग, पोर्चुगलले साङ्गठनिक विस्तारलाई तीव्र बनाउँदै काल्दास दि रैना क्षेत्रमा नयाँ उपसमिति गठन गरेको छ । हालै सम्पन्न विशेष भेलाले सन्जय कुमार महत्तोको संयोजकत्वमा ९ सदस्यीय उपसमिति सर्वसम्मत रूपमा चयन गरेको हो ।
सरोज यादवको संयोजनमा सम्पन्न भेलाले कार्यविभाजनसमेत टुङ्ग्याएको छ । उप–संयोजकमा बलबहादुर परियार, सचिवमा राजेश जङ्ग ठकुरी र कोषाध्यक्षमा कञ्चन लामा चयन हुनुभएको छ । सदस्यहरूमा पदमराज गुरुङ, अम्बिका पाण्डे, अम्बिका थापा, एन्जिला कुँवर र सरोज लामा तामाङ रहनुभएको छ ।
कार्यक्रममा प्रवास नेपाली सम्पर्क विभाग पोर्चुगलका संयोजक नरफगामी मगरको प्रमुख आतिथ्य रहेको थियो । साथै सीता सुवेदी ढकाल, उमेश खड्का र गोविन्द पोखरेल अतिथिका रूपमा सहभागी हुनुहुन्थ्यो । भेलामा ‘जेन्जी’ आन्दोलन र नेपालको पछिल्लो राजनीतिक घटनाक्रमबारे गम्भीर छलफल गर्दै विचार र डेलिभरीमा आधारित नयाँ राजनीतिको आवश्यकता औँल्याइएको थियो ।
विभागका सचिव शिवराज कँडेलले सञ्चालन गर्नुभएको कार्यक्रममा वैचारिक विमर्शसँगै करिब २० जना नेपालीहरूले रास्वपाको सदस्यता पनि ग्रहण गरेका छन् । पोर्चुगलका विभिन्न सहरमा बढ्दो साङ्गठनिक सक्रियताले प्रवासमा रहेका नेपालीहरूमा वैकल्पिक राजनीतिको आशा जगाएको सहभागीहरूले बताएका छन् ।
पोर्चुगलमा कार्यरत एटीएम अनलाइन न्युजका संवाददाता चुडामणि पोखरेलले जानकारी दिनुभएको हो ।
