नेपालगन्ज ।
प्रातःकालीन हिँडाइ(नेपालगन्ज वाकाथन)मा सहभागी हुन स्वास्थ्य मन्त्री प्रदिप पोैडेल शुक्रबार नेपालगन्ज आइपुगेका छन ।
नेपाल चिकित्सक भेरी शाखाको आयोजनामा शनिबार(भोलि) बिहान ६ः३० बजे उक्त कार्यक्रम हुन लागेको हो । नेपालगन्जको गणेशमान चोकबाट सुरु हुने वाकाथन वीपी चोक, बीरेन्द्र (धम्बोझी) चोक हुदै पुनः गणेशमान चोकमा आएर समापन हुने कार्यक्रम संयोजक एवम् वरिष्ठ बालरोग विशेषज्ञ डा. किशोर खत्रीले जानकारी दिए ।
वाकाथनको सम्पूर्ण तयारी पूरा भएको डा. खत्रीले बताए । ‘हामी नेपालगन्ज आईसकेका छौं, भोलि हामी नेपालगन्जबासीका लागि हिड्दैछौ, हजुरहरु सबै जना गणेशमान चोकमा जम्मा हुनुहोला,’ कार्यक्रमको पुर्वसन्ध्यामा डा. खत्रीले भने ‘हामीसँग हिड्नका लागि सबै जनसमुदायको सहभागिता हुनेछ ।’
वाकाथनमा सबैभन्दा अग्र पंक्तीमा दृष्टिविहिन, अपांगता भएका ब्यक्तिहरु(ह्वीलचियर), विभिन्न धर्मगुरु र त्यसपछि अन्य ब्यक्तिहरु सँग-सँगै हिड्नेछन् । उक्त कार्यक्रममा प्रमुख अतिथी एवम् स्वास्थ्य मन्त्री प्रदिप पौडेल पनि सहभागी हुने डा. खत्रीले बताए । उनले थपे, ‘यो खोप लगाउने अभियान हो, हामी हिड्यौं भने जिन्दगीभर स्वस्थ्य भएर बाँच्ने आधार हुनेछ ।’
स्वास्थ्य सचेतना विस्तार गर्ने तथा नेपालगन्जका पर्यटकीय स्थलहरुको प्रवर्द्धन गर्ने र आम नेपाली दाजुभाई, दिदीबहिनीहरुलाई एकताको मालामा गास्ने उद्देश्यका साथ स्वास्थ्यका लागि प्रातःकालीन हिँडाइ भन्ने मुल नारासहित प्रातःकालीन हिँडाइ (वाकाथन) कार्यक्रम गर्न लागिएको जनाइएको छ ।
